ياعم يابتاع الكتب للشاعر د.ابراهيم علي
ياعم يابتاع الكتب
عندك كتاب محتاج له انا
لفيت عليه في المكتبات
بقالي فوق عشرين سنة
مش لاقي كتاب اسمه
الأصول والجدعنة
قال لي دور في الكتب
يمكن تلاقي
انا فاكر كان في كتاب
لسة باقي
بصيت في كل الرفوف
من فوقيها لتحتها
ولقيت رواية
خدني الفضول وفتحتها
عنونها كان مسمار جحا
ناداني صاحب المكتبه
لقيت الكتاب
قلت لا وعدم وجوده
مصلحة
بعد ماقرأت الروايه
كنت شاهد
ان مسمار جحا
في كل المشاهد
في الشغل مديري
مسمار جحا
في الشارع ادوس على
مسمار جحا
اقوم صباح الخير
يا مسمار جحا
وبالليل يسعد مساء
مسمار جحا
بين اصحابي يدخل جحا
ويطلع جحا
لقيت جحا بمسماره
سرق حياتي
وكأن مسمار جحا
مدقوق في ذاتي
مسمار جحا
بلغ أقصى مداه
مسمار جحا اصبح
اسلوب حياة
٠٠٠٠٠٠٠٠٠٠٠٠٠٠٠٠٠٠٠٠
إبراهيم علي
تعليقات
إرسال تعليق