ماشفت يوم الفرح للشاعر سيد محسن الموسوي
(( ما شفت يوم الفرح ))
گضيّت عمـري أوّن هـالـدهر بيـّه ايـفر
بيده آنه لعبه صرت يدفعني مره ايجر
خلاني نبته أبـجدب واعليّه شح المـاي
اذاني صيفه اليغث واهبوبـه بيّه ايضر
سيّل ادموعي غصِب وأتچوّي بالخدين
وما كفه سيل الـدمع بعيوني رمل ايذر
ولو ردت آنـه الـفرح غطاني بـالأحـزان
ما عنده رأفه ورحم عازم لفجعي ايصر
احنالي وسفه الـظهر والحيـل مني راح
والبدن سعفه ايخفج والريـج أصبح مر
شنهي جناتي صحت والدهر شد اويـاي
ما شفت يـوم الفـرح ولا يـوم هـو أيسّر
أسيوفـه سلهـا عليّ محـرب أبـد ما هـاد
طعناتـه بيـّه اوجرن ومـا جـاز ظل ايكـر
أوهن الـحيل وگصه خلاني اطلب عـون
شگيت ثوبي صحت يا خلگ شنهو السر
جلبابي صـار الحزن وانفاسي كلها آهات
شأعتب شگل للدهر ولـصوبي همـّه ايوّر
للـشِمت يضحـك يِسر بـالفـرح يگصد ليه
وسهمي الأحــزان وألـم لـو راد بيـّه ايمر
چـذاب من ابتسم اجروحي كلهـا اغمـاج
دنياي ظلمه اصبحت والفجر ما هو ايطر
سيد محسن الموسوي
تعليقات
إرسال تعليق