قبل الولادة للشاعر د.عبدالحميد وهبه
( قبل الولادة )
ليه يا دنيا بتظلميني كل مادا
حاطة ليه دايماً عليا وبزيادة
هو ده بالنسبة ليكي الطبيعي
ولا أصبح جرحي عندك يعني عادة
كل يوم بقى يعني أصعب م اللي قبله
والعيون من كتر دمعي بجد دِبلوا
حتى حُبي اللي حِلمت في يوم أقابله
مات بإيدك وإندفن قبل الولادة
ليه يا دنيا بتظلميني كل مادا
ماتقوليلي يا دنيا ليه جاية عليا
ماتسيبيني في حالي لجل أعيش حياتي
قافلة ليه طُرق الفرَح قدام عينيا
خلّيتيني أسير ما بين دمعي وسُكاتي
إنسي حبة يا دنيا مرة وخِفّي عني
هو غيري مافيش خلاص في الدنيا يعني
بدعي رب الكون عليكي في يوم يعينّي
وألقى حظي من الفرَح ومن السعادة
ليه يا دنيا بتظلميني كل مادا
يوم ما قلبي حب إنه في مرة يعشق
شاف بعينه الطريق مقفول قصادُه
هو حبي معاكي كان في إيه هيفرق
ولّا هو الحب لسه ماجاش ميعادُه
كل ما أهرب للفرَح وأعمل محاولة
بتقوليلي بالعذاب إنت اللي أولَى
واخدة جرحي معاكي ليه دايماً مقاولة
نفسي أفهم الخلاصة والإفادة
ليه يا دنيا بتظلميني كل مادا
بقلمي عبدالحميد وهبه
تعليقات
إرسال تعليق