جسد بلا روح للشاعر وائل البطراوي
#جسد_بلا_روح
وأفتكر لو أتقابلنا يوم صدفة
ما تفتحش تانى فى المواضيع
كل اللى شوفته معاك يكفى
معدش حيلتى عمر باقى يضيع
عشت عمر معاك على أمل إنك تتغير
وأمنى الروح يمكن أرتاح
ويعدى اليوم وتزيد قسوة
وتزيدنى هموم وعذاب وجراح
أنا كائن يشبه إنسان
لكن #جسد_بلا_روح
انا كتاب من غير عنوان
مش مفهوم حتى إن كان مفتوح
فيه ناس بتعيش ع الذكرى
وبتكمل وحيدة لسنين قدام
وفيه ناس بتخاف من بكره
ل يكون زى الماضى كله ألام
على قد ما كنت كتير بأعطى
من عمرى ومفيش مردود
على قد ما كنت حريصة تكون مرضى
كان قلبك دايماً مسدود
وجودك دايماً متأخر
عن كل وقت أحتاجك فيه
وكلامك لو مرة تقوله
بعد ميعاده يفقد معانيه
أنا عمرى ما حسيت يوم قربك
وأنا بصرخ من قولة أه
إحساس صعب يكون إنسان جنبك
لكن أوجاعك مش فارقة معاه
جربت معاك ألف طريقة
علشان المركب يوم تمشى
كنت أتغاضى عن إى حقيقة
وحاولت كتير ما أستسلمشى
وداريت دموعى فى أحزانى
ولا بلت يوم رمشى
كنت بحاول أمسك فى كيانى
قدامك. وانهار بعد ما تمشى
علشان عارفاك آسى أنانى
ما هتبقى فى يوم من صفى
كنت ألبس فى قناع تانى
وابان أقوى كتير من ضعفى
أنا أصلاً إنسانة ضعيفة
وضعفى مش قلة حيلة
أنا قاصدة أكون سهلة وخفيفة
ويوم ما امشى تبقى السيرة جميلة
✍️ وائل البطراوى
تعليقات
إرسال تعليق