نفذ شعري للشاعر زهير العسكري
(نفذ شعري)
نفذ شعري يا صاحب وارد اسولف خارج المألوف
نفذ شعري ولا حسيت مره ابيوم
وجهك لا ضحك لا مره هزه البيت
كئيب اشبيك وجهك احلك امن البوم
مو تنقيص من البوم
ابد والله
ولكن مثل يضرب لايقاس ايجوز مني البوم عند الله چبير
وبالقيامة اتحسر اعلى الريش
ماله وخاف اتمنى روحي الغصن
من يرمي فوگه اترابه وارماله
واخاف اتمنى روحى الرمله
ذيچ اللاذت ابين الجنح
لان بيها كرامه اتصير وانه اتحسر اعليها ،
عموماً نرجع لوجهك يا صاح اشبيك
يا مدري شگلك
ولا اني امخالط الشينات يسبگ زيني والمعروف
اريدك كون لجروحي تروف اريوف
اريدك كون بالفزعة گبل ما اگول حيهم
تعبر صولتك بسيوف
موش اسيوف باطل لا حشا لله
اريدك دائماً وياي بس عالحگ
وإذا بادر غلط مني تجيني وتكشف اعيوبي
وترجعني ابمحبه وشوگ للمشحوف
اغمج بعد ها يا صاح چنك تعرف الحسچة
وفهمت البلگلب للغرب ما مشيوف
اريد اليوم احاچيك بسوالف بيها خارج كل قوانين الشعر لا بل زاحفات ازحوف
لأن ما أثرت بيك القوافي
البيها ديوان العتاب
الما شفت واحد منهن كتب گبلي عليه
وحاكه حوك الغزل شبه الصوف
ولكن يمكن ابعثلك رسالة وبيها لهجه
من الكلام الينعرف
خارج وزنه عن البحر والأوزان بلكت يوصل اسرع
للي رايد يفهم البيه ويردلي بفعل موش اقوال
ما الها اصل
الكلمة والموعد امام يشور او ينزار
هذا قاموسي ياصاحي اليوم لا تحتار
لو دارت الايام والگلمة تراهي
أمضى من طعنت خناجر
مرادفات بضهري وياهن الفول الطويلة مروشنات
او فوگ هذا مگطعيني بكطع مال اسيوف
،بعد عندي شحيح من الأمل
مترجي تفهمني
عنيد وما اطخن راس
إذا صار المزامط
من عدو معروف
ما معروف
ما يفرق عليه ولا اهابن ساعة المحتوف
ترى الايام خلصت
والعمر يركض
وانته ابكيفك تفرزن كلامي وتلكط المعنى الحقيقي
الما اريده ايبان للعربان
واحفظ باقي ماي الوجه
ما بايع بعدني بسچة العدلة
ويمكن تعض اصبع ندامه العمر كله
لانك ما سمعت الي بلاعيمي عليهم بحت
وطول العمر مبحوح
شحچيلك بعد ياصاح خاف
اسمي او ينقرى المكسوف
نفذ شعري يا صاحب وارد اسولف خارج المألوف
زهير العسكري
تعليقات
إرسال تعليق