وقت فاضي للشاعر عبدالحميد وهبة
( وقت فاضي )
كان شعورَك بيّا عادي
ده الي شُفتُه من البداية
كان مُجرّد وقت فاضي
كُنت بِتقضّيه معايا
يعني مش هأقدر أكمّل
دي الحكاية بإختصار
وإنّ مهما كان هَيحصّل
كان لابُد آخُد قرار
والقرار كان إنّي أبعد
وآجي على قلبي وأرفُض
وأكتب بإيدي النهاية
كان شعورَك بيّا عادي
ده اللي شفته من البداية
كُنت تُقعد جانب منّي
تِحكي دايماً بالساعات
ماأفتكَرتِش أمشي يعني
كُنت بَسمَع من سُكات
عُمري ما أتوقّعت إنّك
كل ده يحصلّي مِنّك
كان قرار البُعد عنّك
( رد فِعل لقلب مات )
نفسي بس بجد أفهم
كُنت بالنسبالك إيه...؟
بتهيألّي اللهُ أعلم ....!
إستراحة أو كافييه
اللي فيها تقضّي وقتك
فيها تتكلم براحتك
عمري مرة ما يوم جرحتك
أو سألتك مرة ليه
والقرار كان إنّي أبعد
وآجي على قلبي وأرفُض
وأكتب بإيدي النهاية
كان شعورَك بيا عادي
ده اللي شُفتُه من البداية
كان مجرد وقت فاضي
كُنت بتقضّية معايا
بقلمي عبدالحميد وهبه
28/7/2023
تعليقات
إرسال تعليق