قدمنا السبت للشاعر عبدالحميد وهبه
( قدّمنا السبت )
ياما كتير قدِّمنا السبت
عشانُه عملنا اللي عملناه
علشان مرة نلاقي الحد
مافيش ولا حد معاه لاقيناه
ومافيش حد أصلاً في حسابُه
سايق فيها قوي بجنابُه
وعامل إنه خلاص مش فاكر
كدة أثبتلّي من أفعالُه
إن لا شئ بيفضل على حالُه
وإن الصبر أكيد له آخر
كل الخير اللي أنا قدّمته
عن طيب نفس خلاص أنا سِبتُه
وبلاش أظلِم نفسي معاه
ياما كتير قدّمنا السبت
عشانُه عملنا اللي عملناه
كنت ببّدّي مصالحُه علّيا
وياما إدّيت الخير بزيادة
كان بسلامتُه يلاوع فيّا
وييجي علّيا كتير كالعادة
وأنا من طيبتي باقيت بستحمل
وبقول بكره أكيد يتغيّر
أتارية صعب أكتر م الأول
ومافيش حاجه فيه بتأثر
لما تَعبني وزاد قوي فيها
أنا قررت أبعد وأسيبُه
بعد ما عاش يعني مقضّيها
بكره أكيد مصلحتُه تجيبُه
وقتها بقى راح أقولّه يحنّن
عِيش في غرورك بقى وإطمّن
قلبي خلاص قالهالُه وأعلّن
باب الخير إحنا قفلناه
ياما كتير قدّمنا السبت
عشانه عملنا اللي عملناه
بقلمي عبدالحميد وهبه
24/6/2023
تعليقات
إرسال تعليق