يالنسيت للشاعر سيد محسن الموسوي
(( يالنسيت))
يالرحت عني وجفيـت
انته ما تدري اشنسيت
اجروح ناسيها بـدليلي
ومنهـا ابـداً ما شفيـت
وناسـي بـحشاي الألم
ونـــار بيهـا ألـوجريـت
وبفكري ناسيلك وهم
دوهنت عگلي ومشيت
وبـروحي ناسيلك حزن
بيـه مــجبـور ارتـضيت
وناسي بـعيـوني ظـلام
وشمعتّك آنـه الضويـت
ونــاسي ببــدانـي وهـن
ومنّـه اتـعكز صـفيـــت
وعندي نـاسيلك رسـايل
وسـفـه غـرتّني وهـويت
وناسي عـهـدك والـحلف
يا حسافه...الما وفيــت
شـالـذنب آني الجنيتــه
وبـالهجـر انتــه ابتديـت
اشــحصلـت من ابـعـدت
گلـي يـالجافـي اشجنيت
اســرارك ابـحفـظ وامـان
لا تـظن بيـهـا حچيــت
چـذّب الگلـّك سـمعهـا
بصدري لأسرارك خفيـت
امهنـّه بالردته وغويته
روح وافعـل مـا نويـت
خـاين.........أفعالك مكر
جشـع أبــداً مكتفيـت
وانـــه صابـــر محتسـب
بقصتي صدگ ماطريت
مـالي غير اللـه ونبيّـــه
لــذت بيهـم واحتـميـت
سيد محسن الموسوي
تعليقات
إرسال تعليق