الواد الحلو للشاعر عبدالحميد وهبه
( الواد الحلو )
الواد الحلو ده أصلُه منين
بيعدّي علّيا بقالُه يومين
ده سحرني وخطف القلب معاه
ماعرفش واخدني معاه على فين
الواد الحلو المتقّسم
خطواتُه بتمشي وبتعلّم
طب أروح وأتقرّب وأتعرّف
ولّا أبعد عنه خلاص أسلَم
الواد ده خطَفني بتقاطيعُه
مانيكان عن جد في توزيعُه
خلّاني أقول عمري أبيعُه
في مقابل كلمة ونظرة عين
الواد الحلو ده أصلُه منين
الواد الحلو ده مش عادي
عمّال يتمّشى على الهادي
خلّاني خلاص جِبت أنا آخري
من وقت ما فات يعني قصادي
خلّاني بجد بقى أتحَيّر
كل لمّا بشوفُه أنا بتأثّر
أوصلُّه يا ناس بس مش أكتر
وبتُقلُه وعِندُه هكون راضي
الواد بقوامُه صحيح يخطَف
بتمنى بجد لو إني أعرف
أتكلم وياه لو كلمة
وأشرحلُه أكيد يعني الموقف
مين اللي يروحلُه بقى يقولُّه
عن لهفة قلبي ويوصفلُه
أنا يعني لو أقدر أوصلُّه
هستسمح قلبُه وهستَعطَف
بقلمي عبدالحميد وهبه
تعليقات
إرسال تعليق