ثلاث دقات للمبدعة مها سلطان

رؤى ...

ثلاث دقات ...

ثلاث دقات على القلب ... من برة ...

تدَّوب الصخر ... لوكان صلد ... 

متين مرة ...

أنا الِ نبضى بيسرى ... كما السيل ...

 أنا الِ البحر واخدنى ... كما الطير ... نورس واقف ... على مرفا ... 

مستنى شراع مركب ... تاهت فى اللُجة ... 

بلا مجداف ولا مينا ... ولا مَرسى ...

يطول الليل ... فى تسهيدة ... 

وأنا الِ فى كل فجر أصحى على ...

ضيا خالك ... ينور عتمة الأيام ...

 وكأن نبض قلبى ... وكل دقة منه ... غرام ...

أنا الِ بسهر أناجى ... نجوم الليل ...

وأنا الِ حكايايا ... كما القنديل ... 

ينور فى النفوس ... شمعة ...

أنا الِ عارفة إن الأصل فى الحياه ... همسة ... 

وإن العمر بيعدى ... وإن الضحكة ويايا ... كما الطيف ... 

بيتحرك فى سكون الليل ...

 يدق على قلبى ...  تلات دقات ... 

يصَّحِى جوايا عِشق الحياه ... من سُكات ...

وينفُض عنها السُبات ... 

ماأنا فى الأصل ... بعشق كُل الحاجات ...

إسمع كدة ... ضحك البنات ... 

١٠ فبراير ٢٠٢١

مها سلطان